PONTEN PIE INVITA AO PÚBLICO FERROLÁN A COMER

A compañía de novo cabaré Ponten pie invita ao público ferrolán a comer ao restaurante Copacabana

• As representacións pechan o ciclo O Jofre fóra de si e terán lugar no teatro ferrolán venres e sábado ás 21 horas

• A edil Mercedes Carbajales invita á cidadanía a reservar a entrada, que é de balde, no Punto de Información Cultural

Ferrol, 25 de agosto de 2010.-

A compañía de novo cabaré Ponten Pie será a encargada de pechar este venres e sábado o programa O Jofre fóra de si, un ambicioso proxecto que incluiu propostas artísticas non convencionais de danza, música e teatro que convertiron a cidade nunha extensión do teatro ferrolán, en cuxas rúas e prazas buscaron ao público para facelo partícipe dos seus proxectos. Nesta ocasión o espectáculo que a cidadanía poderá ver leva por título “Copacabana” e representarase ás 21.00 horas na caixa escénica do Teatro Jofre este venres e sábado, 27 e 28 de agosto.

A este respecto, a edil Mercedes Carbajales explicou que, se ben a entrada ao espectáculo é gratuíta, é necesario facer a reserva no Punto de Información Cultural do Teatro (PIC) a través do número de teléfono 981 944 245. O seu horario de atención ao público é de martes a venres, de 11.00 a 13.00 e de 18.00 a 20.00 horas. Tamén os sábados, domingos e festivos de función.

Fundada no ano 2009 por Sergi Ots, Ponten Pie é unha compañía que naceu como plataforma para este artista catalán, para poder actuar baixo esta denominación e pór en marcha proxectos propios relacionados coas artes escénicas. Tamén co obxectivo de poder traballar nun espazo persoal autónomo no que crear diferentes equipos técnicos e artísticos segundo as necesidades de cada proxecto. Co que presentará esta semana en Ferrol, “Copacabana”, Sergi Ots inicia unha nova etapa como director. Nel fusiona dentro dun mesmo espazo a gastronomía, o cabaré e o teatro de obxectos. A escenografía de “Copacabana” instálase como un restaurante real onde os comensais e espectadores poderán probar os deliciosos pratos que serán preparados polos actores. Así, un dos interrogantes cos que xoga a posta en escea é se o espectador é recibido como un cliente dun restaurante ou como espectador dunha obra teatral. Detrás dos fogóns do Copacabana atoparanse tres cociñeiros descendentes dun chef do recoñecido circo Bimil que recentemente pechou as súas portas, polo que os tres gourmets, con poucos recursos económicos, deciden voltar a Europa para abrir un restaurante nun vello local ás aforas da cidade coa esperanza de facer fortuna.

A traxectoria profesional de Sergi Ots deu comenzo no Gran Teatro do Liceo como especialista en circo no ano 2000 e tras esta primeira toma de contacto co mundo do teatro profesional pasou traballar como actor con Xirriquiteula, La Companya del Foc, L'Avalot Teatre e Carro de Baco, entre outras. Entre os seus últimos traballos destaca a colaboración como actor con Els Comediants desde o ano 2004. Tamén a súa participación como clown con Cirque Du Soleil, con quen percorreu Xapón e Australia no ano 2008 co espectáculo Dralion.

MARCHA CICLISTA A FERROLTERRA

O Patronato de Deportes patrocina este sábado a XIII Marcha Ciclista a Ferrolterra
• O edil Manuel Santiago anima á cidadanía a participar nesta cita que partirá do pavillón da Malata ás tres da tarde
• O presidente do Clube Ciclista, Juan Martínez, avanza que os 120 quilómetros de ruta son de dificultade media-alta


Ferrol, 25 de agosto de 2010.-

O concelleiro de Deportes, Manuel Santiago, acompañado do presidente do Club Ciclista Ferrol, Juan Martínez, presentaba esta mañá no Salón de Recepcións do Concello de Ferrol a XIII Marcha Ciclista a Ferrolterra. Unha proba que patrocina o Patronato de Deportes e que se desenvolverá na xornada do sábado 28 de agosto con saída do pavillón polideportivo da Malata ás 15 horas.

Así as cousas, Manuel Santiago animaba á cidadanía a participar nesta cita na que poden participar tódolos deportistas maiores de 15 anos. O edil subliñaba a dureza do percorrido e tamén a beleza dunha proba que discurre pola maior parte dos teritorios da comarca de Ferrolterra e tamén de Ortigueira. Un atractivo máis, engadiu o concelleiro, para subirse á bicicleta esta fin de semana e coñecer esta parte do territorio dende outra perspectiva.

Pola súa banda, o presidente da entidade promotora, Juan Martínez Rey, explicou que se trata dunha marcha esixente, de dificultade media-alta e dirixida principalmente a ciclistas federados. Nembargantes, apuntou que é aberta polo que aqueles aficionados á bicicleta que non estean federados e teñan unha boa forma física poden apuntarse.

A organización solicitará unha licenza á federación para poder disputar a proba. O único requisto ademáis de cumprimentar a folla de inscrición e aboar o seu importe (13 euros para os federados e 21 euros para os non federados) é acudir provisto de casco e bici. Respeto do recorrido, Martínez avanzou que logo de saír da Malata, o pelotón tocará nove concellos (amáis de Ferrol, Narón, Valdoviño, San Sadurniño, Moeche, Cerdido, Cariño, Ortigueira e Cedeira). En total, 120 kilómetros, tras os que os participantes regresarán ao punto de arranque. Polo camiño, haberá un avituallamento: no Mirador Alto dos Carrís. Asemade, a organización disporá dun vehículo de apertura da marcha, un coche de asistencia e unha ambulancia.

Así as cousas, Martínez Rey prevé que se cubran as 75 prazas previstas pola organización, con corredores tanto de toda a Comunidade Galega coma de fóra dela. Ao remate, previsto para as 20.30 horas, se entregarán recordos a todos os participantes, así como agasallos ao ciclista máis novo, ao máis veterano, ao clube máis numeroso, ao corredor máis sufridor, á desgracia, ou ao máis simpático, entre outros. Nesta liña, recordou que as inscricións poden realizarse enviando o boletín de inscrición ao apartado de correos 1044 -15406 de Ferrol; por Internet, a través da páxina www.clubciclistaferrol.es; no número de fax 981 327 662 e 981 448 439 ou en Ciclos Roca, firma colaboradora. Tamén o mesmo día da proba no lugar da saída.